இலங்கையின் எதிர்காலம் சிறப்பதற்கு பங்களிக்கும் ஒரு முன்னோடி மற்றும் வலுவான நகர்வாக, நிலம் மற்றும் இயற்கையைப் பாதுகாக்கும் (Preserving Land and Nature – PLANT) முயற்சிக்கு ஆதரவளிப்பதற்காக, Wildlife and Nature Protection Society of Sri Lanka (WNPS) உடனான கூட்டாண்மை குறித்து அலியான்ஸ் இன்சூரன்ஸ் லங்கா லிமிட்டெட் அறிவித்துள்ளது. வனப்பாதைகளை உருவாக்குதல், இலங்கையில் அழிவடைந்து வருகின்ற சுற்றுச்சூழல் கட்டமைப்புக்களை மீட்டெடுத்தல், பல்லுயிரினங்களை ஊக்குவித்தல், மற்றும் காலநிலை நெகிழ்திறனை மேம்படுத்தல் ஆகியவற்றுக்கு அர்ப்பணிக்கப்பட்டுள்ள அறிவியல் அடிப்படையிலான பாதுகாப்பு நிகழ்ச்சித்திட்டமே PLANT ஆகும்.
நிலைபேற்றியல் கொண்ட காப்புறுதி மற்றும் நிறுவன சமூகப் பொறுப்புணர்வு ஆகியவற்றில் அலியான்ஸ் லங்கா தற்போது காண்பித்து வருகின்ற அர்ப்பணிப்பில் ஒரு மிக முக்கியமான மைல்கல் சாதனையாக இந்த கூட்டாண்மை மாறியுள்ளது. கூட்டு நடவடிக்கையின் மூலமாகவே அர்த்தமுள்ள மாற்றம் ஆரம்பிக்கின்றது என்ற நிறுவனத்தின் நம்பிக்கையை இம்முயற்சி பிரதிபலிப்பதுடன், ஒரேயொரு பூமியே நம் சொத்தாகவும், தாயகமாகவும் உள்ளமையால், இப்பூமியைப் பாதுகாப்பதில் நாம் அனைவரும் எமது பங்களிப்பை ஆற்ற வேண்டும் என்ற அதன் நிலைப்பாட்டையும் எடுத்துக்காட்டுகின்றது.
இந்த கூட்டாண்மையின் கீழ், 2025 ஒக்டோபர் 30 முதல் விற்பனை செய்யப்படுகின்ற ஒவ்வொரு மோட்டார் மற்றும் பிரயாண காப்புறுதிக்கும் தனது வாடிக்கையாளர்களின் சார்பில் அலியான்ஸ் லங்கா தனது நிதிப் பங்களிப்பை வழங்கவுள்ளதுடன், இந்நிதியானது இலங்கை எங்கிலும் காடு வளர்ப்பு, வாழ்விட மறுசீரமைப்பு, விழிப்புணர்வு மற்றும் பல்லுயிரின பாதுகாப்பு தொடர்பான செயற்திட்டங்களுக்குப் பயன்படுத்தப்படும். 2050ம் ஆண்டளவில் நிகர உமிழ்வை பூஜ்ஜிய மட்டத்திற்கு கொண்டு வர வேண்டும் என்ற இலக்கினைக் கொண்ட அலியான்ஸ் குழுமத்தின் உலகளாவிய சூழல், சமூக, மற்றும் ஆட்சி நிர்வாக மூலோபாயத்தின் உள்ளூர் வெளிப்பாட்டை இம்முயற்சி பிரதிபலிக்கின்றது. நிலைபேற்றியல் கொண்ட காப்புறுதித் தீர்வுகளை ஊக்குவித்து, காலநிலை நெகிழ்திறன் மற்றும் சமூகரீதியாக பொறுப்புணர்வு மிக்க செயற்திட்டங்களில் முதலிடுவதன் ஊடாக 2019ம் ஆண்டின் மட்டங்களுடன் ஒப்பிடுகையில், 2025ம் ஆண்டில் உள்ளக உமிழ்வுகளை 70 சதவீதத்தால் குறைக்கும் நோக்கினை அது கொண்டுள்ளது.
நாட்டில் உள்ளூர் இயற்கை இனங்கள் செறிந்துள்ள, பிரதானமாக தென்மேல் பிராந்தியங்கள் உள்ளிட்ட முக்கிய இயற்கை உயிரினங்கள் செறிந்துள்ள இடங்களைப் பாதுகாத்து, வனப்பாதைகளை உருவாக்குதல் மற்றும் வாழ்விட மறுசீரமைப்பு ஆகியவற்றில் கவனம் செலுத்தியுள்ள இலங்கையின் மிகவும் பழமை வாய்ந்த மற்றும் மிகுந்த செயற்பாடுகளைக் கொண்டுள்ள பாதுகாப்பு சார்ந்த அமைப்பான WNPS ன் பிரதான செயற்திட்டமாக PLANT முயற்சி அமைந்துள்ளது. தற்போது 33 இடங்களில் தனது பணிகளை PLANT முன்னெடுத்து வருவதுடன், மிகவும் அழிவடைந்து வருகின்ற 125 உயிரினங்கள் அடங்கலாக, 1250 க்கும் மேற்பட்ட உயிரினங்களின் வாழ்விடமாக இப்பிரதேசங்கள் காணப்படுவதுடன், 25 கிலோமீட்டருக்கும் மேற்பட்ட வனப்பாதைகளை உருவாக்கும் முயற்சியையும் ஏற்கனவே ஆரம்பித்துள்ளது. அதன் முன்னணி செயற்திட்டங்களில் ஒன்றான புதுன்வெல காடு வளர்ப்பு செயற்திட்டம், யானை, சிறுத்தை மற்றும் ஏனைய உயிரினங்களின் இடம்பெயர்வுக்கான முக்கியமான நிலப்பகுதி பகுதியளவில் சிதைந்துள்ள நிலையில், அதில் 24 ஏக்கர் விஸ்தீரணம் கொண்ட நிலப்பகுதியை மறுசீரமைத்து, பாதுகாக்கும் முயற்சிகளை முன்னெடுத்து வருகின்றது. மேலும், உயிரின வாழ்விடங்களின் இணைப்பை மேம்படுத்தி, மற்றும் மனிதர்களுக்கும் யானைகளுக்கும் இடையிலான மோதலைக் குறைத்து, மலைநாட்டின் பெருந்தோட்டப் பிரதேசங்களில் 20 கிலோமீட்டருக்கும் மேற்பட்ட வனப்பாதைகளை உருவாக்கி வருகின்றது.
அலியான்ஸ் இன்சூரன்ஸ் லங்கா லிமிட்டெட்டின் பிரதம நிறைவேற்று அதிகாரியும், இலங்கைக்கான முகாமையாளருமான பிரஷாந் குரோவர் அவர்கள் இக்கூட்டாண்மை குறித்து கருத்து தெரிவிக்கையில்:
“காப்புறுதிக்கும் அப்பால், பாதுகாக்கப்பட வேண்டிய முக்கியமான விடயங்களாக எமது பூமியையும், மற்றும் நாம் அனைவரும் பகிர்ந்து கொள்ளும் எதிர்காலத்தையும் பாதுகாக்க வேண்டும் என்பதை அலியான்ஸ் எப்போதும் நம்புகின்றது. நாம் முன்னெடுத்து வைக்கின்ற ஒவ்வொரு அடியும், எமது வாடிக்கையாளர்கள், எமது சமூகங்கள், மற்றும் எம்மைச் சூழவுள்ள உலகம் ஆகியவற்றில் நீண்ட காலத்திற்கு நிலைபெறக்கூடிய மதிப்பைத் தோற்றுவிக்க வேண்டும் என்ற அர்ப்பணிப்புடன் முன்னெடுத்து வைக்கப்படுகின்றது. WNPS மற்றும் PLANT முயற்சி ஆகியவற்றுடனான எமது கூட்டாண்மையின் மூலமாக, இலங்கை இயற்கை சூழல் கட்டமைப்புக்களை மறுசீரமைத்து, எதிர்வரும் தலைமுறைகளின் நலனுக்காக அதன் இயற்கை பல்லுயிரினங்களைப் பாதுகாக்கும் அர்த்தமுள்ள நடவடிக்கைகளை நாம் மேற்கொள்கின்றோம். ஒரேயொரு பூமியே எமது சொத்தாக உள்ளமையால், இந்த நற்காரியத்தை முன்னின்று வழிநடாத்துவதையிட்டு நாம் பெருமை கொள்வதுடன், அதனைப் பாதுகாப்பது என்பது எமக்கு மிகவும் முக்கியமானவற்றைப் பாதுகாப்பதற்கான மற்றுமொரு வழி என்றே எண்ணுகின்றோம்.”
WNPS அமைப்பின் PLANT முயற்சிக்கான தலைவரான சிறியான் டி சில்வா விஜேரத்ன அவர்கள் இந்த ஒத்துழைப்பு குறித்து தனது கருத்தினை பகிர்ந்து கொள்கையில்,
“இலங்கையின் இயற்கை சூழல் கட்டமைப்புக்களை மறுசீரமைத்து, அழிவடைந்து செல்லும் எமது இயற்கை உயிரினங்களைப் பாதுகாக்கும், முற்போக்கான மற்றும் அறிவியல் அடிப்படையிலான ஒரு அணுகுமுறையாக WNPS PLANT முயற்சி அமைந்துள்ளது. அலியான்ஸ் லங்கா நிறுவனத்துடனான இது போன்ற ஒத்துழைப்புக்கள் பாரிய அளவிலான பாதுகாப்பு முயற்சிகளை முன்னெடுப்பதில் பொறுப்புணர்வுமிக்க வர்த்தக நிறுவனங்கள் ஆற்றுகின்ற முக்கியமான வகிபாகத்தை அடிக்கோடிட்டுக் காட்டுகின்றன. வர்த்தகத்தின் மையத்தில் பாதுகாப்பினை ஒருங்கிணைப்பது மிகவும் வலிமைமிக்க ஒரு வழிமுறையாகக் காணப்படுவதுடன், அதன் மூலமாக வாடிக்கையாளர்களை உள்ளடக்கிய சமூகங்களும் எமது இயற்கை சூழல் கட்டமைப்புக்களின் பாதுகாவலர்களாக மாறுவதற்கு வழிபிறக்கின்றது. வாடிக்கையாளர்களுக்கு ஒரு சதம் மேலதிக செலவுமின்றி, பல்லாயிரக்கணக்கான வாடிக்கையாளர்கள் இப்பயணத்தில் பங்குதாரர்களாக மாறுவதற்கு அலியான்ஸ் வழிவகுத்துள்ளதுடன், அவர்களுடைய குறிக்கோளுக்காக அலியான்ஸ் அணிக்கு நாம் மிகவும் கடமைப்பட்டுள்ளோம். நாம் ஒன்றிணைந்து, எமது சூழலின் நீண்டகால நிலைபேற்றியல் மீது முதலீடு செய்து, இயற்கை பல்லுயிரினங்களைப் பாதுகாத்து, சூழல் கட்டமைப்புக்களுக்கு புத்துயிரளித்து, மக்களுக்கும், வனசீவராசிகளுக்கும் நெகிழ்திறனை வலுப்படுத்துகின்றோம்.”
இரு அணிகளதும் பிரதிநிதிகள் மற்றும் ஊடகவியலாளர்கள் கலந்து கொண்ட நிகழ்வில், அலியான்ஸ் லங்கா நிறுவனத்தின் சார்பில் அதன் பிரதம நிறைவேற்று அதிகாரியும், இலங்கைக்கான முகாமையாளருமான பிரஷாந் குரோவர், பிரதம விநியோக அதிகாரி ரங்க டயஸ், மற்றும் சந்தைப்படுத்தல் முகாமைத்துவ தலைமை அதிகாரி கசுன் யட்டவர ஆகியோர், WNPS மற்றும் PLANT பிரதிநிதிகளான ஜெஹான் கனகரெத்ன மற்றும் சிறியான் டி சில்வா விஜேரத்ன ஆகியோரிடம் அடையாள மரக்கன்றை கையளித்து வைத்துள்ளனர். வனப்பாதை உருவாக்கத்திற்காக நிதியுதவி அளிக்கப்பட்டுள்ள சில பணிகள் மலைநாட்டில் நவம்பரில் ஆரம்பிக்கப்படவுள்ளன.
WNPS முன்னாள் தலைவர் ஜெஹான் கனகரெத்ன அவர்கள் அலியான்ஸ் லங்கா நிறுவனத்திற்கு தனது நன்றியைத் தெரிவித்து கருத்து வெளியிடுகையில், “வலிமைமிக்க வர்த்தக நிறுவனங்கள் தமது தலையீடுகளின் மூலமாக பாதுகாப்பு மற்றும் பொதுமக்கள் மத்தியிலான இடைவெளிகளை எவ்வாறு நிரப்ப முடியும் என்பதற்கு அலியான்ஸ் லங்கா நிறுவனம் மிகச் சிறந்த முன்னுதாரணம். WNPS ஆனது எப்போதும் இலங்கையைப் பாதுகாக்கும் நீண்ட கால நோக்கத்தை அத்திவாரமாகக் கொண்டுள்ளது. குறுகிய கால இலாபங்கள் சிலவற்றை தியாகம் செய்வதன் மூலமாக, பாதுகாப்பு முயற்சிகள் நீண்ட கால நோக்கம் கொண்டவையாகவும், வர்த்தக நிறுவனங்களின் நடவடிக்கைகள் அவ்வப்போது மேற்கொள்ளப்படுவதை விடுத்து, நீண்ட கால நற்பேறைத் தோற்றுவிக்கின்றவையாக மாறுவதற்கான ஒரு தளத்தை இந்நிறுவனத்திற்கு வழங்குகின்றது. பிரபலமான WNPS Loris பிரசுரத்திற்கும் அலியான்ஸ் ஆதரவளித்து வருவதுடன், நாம் சிறப்பாக செயற்பட வேண்டிய காரணத்திற்கான நேரடி உதாரணங்களுடன் உலகெங்கும் பகிரப்படுகின்ற நுண்ணறிவு மிக்க நூற்றுக்கணக்கான உரையாடல் ஆக்கங்களை வெளிக்கொண்டு வருவதற்கு இடமளிக்கின்றது”.
சூழலைப் பாதுகாப்பதிலும், நிலைபேற்றியல் கொண்ட அபிவிருத்தியை மேம்படுத்துவதிலும் முன்னின்று உழைக்கும் தனது அர்ப்பணிப்பை இக்கூட்டாண்மையின் மூலமாக அலியான்ஸ் லங்கா மீண்டும் உறுதிப்படுத்தியுள்ள அதேசமயம், அலியான்ஸ் நிறுவனத்திற்கும், எம் அனைவருக்கும் ஒரேயொரு பூமியே சொத்தாக உள்ளமையால், பூமியைப் பாதுகாப்பதில் அங்கம் வகிப்பதற்கு தனது வாடிக்கையாளர்களுக்கும் உத்வேமளிக்கின்றது.
ஜேர்மனியின் மியூனிக் மாநகரத்தில் தலைமை அலுவலகத்தைக் கொண்ட, காப்புறுதி மற்றும் சொத்து முகாமைத்துவ வணிகங்களில் உலகளாவில் முன்னிலை வகித்து வருகின்ற Allianz SE ன் முழுமையான உரிமையாண்மையின் கீழான துணை நிறுவனங்களில் ஒன்றாக அலியான்ஸ் இன்சூரன்ஸ் லங்கா லிமிட்டெட் இயங்கி வருகின்றது. Interbrand மற்றும் Brand Finance ஆகியவற்றிடமிருந்து “World’s No.1 Insurance Brand” என்ற அங்கீகாரம் அலியான்ஸ் நிறுவனத்திற்கு கிடைத்துள்ளது.
