முன்மொழியப்பட்டுள்ள ‘பயங்கரவாதத்திலிருந்து அரசைப் பாதுகாப்பதற்கான சட்டம்‘ (PSTA) குறித்த தனது அவதானிப்புகளை இலங்கை வர்த்தக சம்மேளனம் சமர்ப்பித்துள்ளது. மேலும், முன்மொழியப்பட்டுள்ள ‘ஒழுங்கமைக்கப்பட்ட குற்றங்களைத் தடுப்பதற்கான சட்டம்‘ குறித்த தனது கருத்துகளை இறுதி செய்யும் பணியில் ஈடுபட்டுள்ள அது, அவற்றை விரைவில் சம்பந்தப்பட்ட அதிகாரிகளிடம் கையளிக்கவுள்ளது.
தேசியப் பாதுகாப்பை வலுப்படுத்துவதற்கும், வளர்ந்து வரும் சவால்களை எதிர்கொள்வதற்கும் அரசாங்கம் மேற்கொள்ளும் முயற்சிகளை அங்கீகரிக்கும் அதே வேளையில், தெளிவான வரையறைகள், பொருத்தமான நீதித்துறை மேற்பார்வை மற்றும் போதுமான சட்ட நடைமுறைப் பாதுகாப்புகளை வழங்குவதை உறுதி செய்வதற்காக, சமீபத்திய சட்ட வரைவைக் கவனமாக மீளாய்வு செய்யுமாறு, சம்மேளனம் அழைப்பு விடுத்துள்ளது. முதலீட்டாளர் நம்பிக்கையைப் பேணுவதற்கும், சட்டப்பூர்வமான உறுதித்தன்மையை நிலைநிறுத்துவதற்கும், மேலும் வர்த்தகம் மற்றும் முதலீட்டிற்கான கணிக்கக்கூடிய மற்றும் விதிமுறைகளின் அடிப்படையிலான இடமாக இலங்கையின் நற்பெயரைத் தக்கவைப்பதற்கும் இத்தகைய நடவடிக்கைகள் இன்றியமையாதவை.
ஐரோப்பிய ஒன்றியத்தின் GSP+ வர்த்தகச் சலுகையை இலங்கை தொடர்ந்து பெறுவதை உறுதி செய்வதன் முக்கியத்துவத்தை சம்மேளனம் வலியுறுத்தியுள்ளது. ஏற்றுமதிகள், வேலைவாய்ப்பு, அந்நியச் செலாவணி வருவாய் மற்றும் பொருளாதார வளர்ச்சி ஆகியவற்றிற்கு இந்தச் சலுகை மிக முக்கியப் பங்காற்றுகிறது. இது தொடர்பாக, புதிய சட்டமியற்றும் நடவடிக்கைகள் இலங்கையின் சர்வதேசக் கடப்பாடுகளுக்கும், சர்வதேச அளவில் ஏற்றுக்கொள்ளப்பட்ட தரநிலைகளுக்கும் இணங்க இருக்க வேண்டும் என்று சம்மேளனம் கோருகின்றது. இதன் மூலம், GSP+ சலுகைகள் தொடர்ந்து கிடைப்பதற்கான வாய்ப்புகள் மேலும் வலுப்படுத்தப்படும்.
பொருளாதார வளர்ச்சி, போட்டித்திறன் மற்றும் நிலையான அபிவிருத்திக்கு ஆதரவளிக்கும் அதே வேளையில் சட்டமியற்றும் சீர்திருத்தங்கள் தேசிய முன்னுரிமைகளை திறம்பட நிவர்த்தி செய்வதை உறுதிப்படுத்துவதற்கு கொள்கை வகுப்பாளர்கள் மற்றும் பிற பங்குதாரர்களுடன் ஆக்கபூர்வமான ஈடுபாட்டினை முன்னெடுப்பதில் இலங்கை வர்த்தக சம்மேளனம் உறுதியாக உள்ளது.
